काठमाडौं : असोज १०, सत्तारुढ नेपाल कम्युनिस्ट पार्टी (नेकपा) र चिनियाँ कम्युनिस्ट पार्टीको बीचमा असोज ६ गते काठमाडौंको पाँच तारे याक एण्ड यति होटलमा सी विचारधारा’ बारेको छलफल र बहस भएपछि त्यो विषयले नेपालको राजनीतिमा नयाँ तरंग पैदा भएको छ । सी विचारधाराको विषयमा छलफल हुनुलाई कतिपय जानकारहरुले आशंकाका दृष्टिले हेरेका छन् भने कतिपयले त्यसलाई साकारात्मक भएको प्रतिक्रिया दिईरहेका छन् । माओ त्सेतुङको नेतृत्वमा सम्पन्न जनवादी क्रान्तिमार्फत कम्युनिस्ट सत्ता स्थापना भएको ७० औं वर्ष मनाउँदै गर्दा चीनले सी जिनपिङ विचारधाराको प्रचारप्रसार गर्न खोजिरहेको छ । चिनियाँ कम्युनिस्ट पार्टीको विदेश विभाग प्रमुख मन्त्री सोङ ताओलाई नै पठाएर दुई पार्टीबीच विचारको छलफल गरिएको छ । तर, सत्तारुढ नेकपा र चिनियाँ कम्युनिस्ट पार्टीबीचको ६ बुँदे समझदारीले अब नेपालको असंलग्न परराष्ट्र नीति नै खल्बलिएको र सत्तारुढ नेकपा पनि चिनियाँ कम्युनिस्ट मोडलमा जाने भयो भन्ने आशंका व्यक्त भएका छन् ।
केहो सी विचारधारा ?
चिनियाँ कम्युनिस्ट पार्टीका महासचिव तथा राष्ट्रपति सी जिनपिङले प्रस्ताव गरेको राजनीतिक कार्यक्रम सन् २०१७ को चिनियाँ कम्युनिस्ट पार्टीको कंग्रेसले पारित गर्यो । जसलाई सी जिनपिङ थाउट अर्थात् विचारधारा भनियो । जसमा चौधबुँदे प्रस्ताव सामेल थियो । बिषेशगरी ‘सुधारको विस्तृत गहिराइलाई निरन्तरता दिने । सन् २०५० सम्म चिनियाँ विशेषतासहितको पूर्ण समाजवाद लागु गर्ने र समाजवादको मालिक हुने चिनियाँ जनता हुने । राष्ट्रको सुरक्षालाई मजबुत बनाउने र चिनियाँ र विश्वभरिका जनताबीच साझा भाग्यका लागि ‘शान्तिपूर्ण अन्तर्राष्ट्रिय वातावरण’ स्थापना गर्ने लगायत अन्य बुँदाहरु रहेका छन् । चीनमा अहिले सी जिनपिङलाई माओभन्दा पनि ठूलो नेताको रुपमा व्याख्या गर्न थालिएको छ । जसको ज्वलन्त उदाहरण सी विचारधारा हो ।
सत्तारुढ नेकपाले भारत, अमेरिका र चीनसँग जस्तोसुक्कै मुल्य चुकाएर भएपनि आफ्नो पार्टीको सम्बन्ध सुधार्न खोजेको छ भन्ने प्रष्ट देखिन्छ । विगतका विभिन्न उदाहरणहरु हेर्दा नेपालका राजनीतिज्ञहरुले आफ्नो पार्टीको स्वार्थ पुर्ती गर्न देशलाई घात गर्नपछि पर्दैनन् भन्ने पनि हाम्रा अगाडी छर्लङ्ग नै छ । जसको उदाहरण कोसी व्यारेज, गण्डक सम्झौता, टनकपुर सन्धी, माथिल्लो कर्णाली जलविद्य्त सम्झौता र अरुण तेस्रो जलविद्य्त आयोजना इत्यादी हुन् । त्यसकारण विगतमा पनि राष्ट्रलाई हानी हुने गरी सम्झौता गरेर आफ्नो पार्टीको सम्बन्ध विदेशी शक्ति तथा राष्ट्रहरुसँग सुधारेको कांग्रेस, अहिलेको सत्तारुढ नेकपाले माथिल्लो कर्णाली र अरुण तेस्रोमा जस्तै सम्झौता गरेर आफ्नो पार्टीको सम्बन्ध सुधार्न खोजको होकी भनेर सशंकित बनेको छ । त्यस्तै विश्वकै दोस्रो शक्ति राष्ट्रका राष्ट्रपति र विश्वकै एक नम्बर ठूलो पार्टीका महासचिव सीलाई नेपाल ल्याउन सके आफ्नो ठूलो सफलता हुने ठानेरै नेपालमा तामझामका साथ सी जिनपिङ विचारधाराको विषयमा छलफल गरिएको हो भन्दा फरक नपर्ला ।
थप भिडियोमा ।
प्रतिकृया दिनुहोस्